’بڑی شکست پر بہانے بازی کی کوشش نہیں کروں گا‘

پاکستان کرکٹ ٹیم کے کپتان سرفراز احمد نے کہا ہے کہ وہ قومی ٹیم کی ورلڈکپ میں بڑی شکستوں پر بہانے بازی کرنے کی کوشش نہیں کریں گے، اگلے میچ میں بہتر کھیل دیکھنے کو ملے گا۔

ان خیالات کا اظہار سرفراز احمد نے پاکستان کرکٹ بورڈ (پی سی بی) کی ویب سائٹ پر شائع اپنے ایک بیان میں کیا۔

انہوں نے کہا کہ میں جانتا ہوں کہ ٹیم کے مداح ویسٹ انڈیز سے شکست کے بعد بہت زیادہ مایوس ہوں گے، ہمیں بھی اس شکست کا دکھ ہے کیونکہ کوئی بھی ورلڈکپ میں اس طرح شکست نہیں چاہتا۔

سرفراز احمد نے کہا کہ ویسٹ انڈیز کے خلاف میچ میں بہت کچھ غلط ہوا، تاہم میں اس طرح بہانوں کے پیچھے چھپنے کی کوشش نہیں کروں گا۔

قومی کرکٹ ٹیم کے کتپان کا کہنا تھا کہ ہم نے شاٹ گیندوں کی تیاری کی ہوئی تھی لیکن بدقسمتی سے ہم ابتدا میں ہی بہت زیادہ وکٹیں گنوا بیٹھے تھے، بالخصوص آندرے رسل کے اسپیل نے ٹیم کو بڑا نقصان پہنچایا جس میں فخر زمان اور حارث سہیل اپنی وکٹ گنوا بیٹھے۔

اپنی بات کو جاری رکھتے ہوئے ان کا کہنا تھا کہ جب ایک ٹیم کے پاور پلے میں ہی 3 اہم کھلاری آؤٹ ہوجائیں تو اس کے لیے آگے بڑھنا مشکل ہوجاتا ہے۔

سرفراز احمد نے بیٹسمین کی جانب سے پارٹنرشپ قائم نہ کرنے کو بھی شکست کی بڑی وجہ قرار دیا اور کہا کہ ہماری سب سے بڑی پارٹنر شپ آخری وکٹ پر ہی سامنے آسکی۔

انہوں نے کہا کہ یہ تاثر دیا جارہا تھا کہ یہ 400 رنز کی پچ ہے یا پھر یہ وہ پچ ہے جس پر ایک سال قبل انگلینڈ کی ٹیم نے ورلڈ ریکارڈ بنایا تھا، حالانکہ ایسا نہیں ہے کیونکہ یہ ایک نئی پچ تھی۔

آصف علی کو ٹیم میں شامل نہ کرنے سے متعلق سرفراز احمد کا کہنا تھا کہ انہیں اس لیے ٹیم کا حصہ نہیں بنایا گیا کیونکہ ہم مکمل بیٹسمین کے ساتھ کھیلنا چاہتے تھے۔

انہوں نے محمد عامر کی باؤلنگ کی تعریف کرتے ہوئے کہا کہ خوشی کی بات ہے کہ عامر فارم میں آگیا ہے، کیونکہ ہم جانتے ہیں کہ اس صلاحیت کیا ہے۔

سرفراز نے بتایا کہ جلد آؤٹ ہوجانے کے بعد ہم نے ویسٹ انڈیز پر پریشر ڈالنے اور ان کی زیادہ سے زیادہ وکٹیں لینے کی کوشش کی لیکن انہوں نے بڑے شاٹ لگا کر پریشر کم کیا۔

قومی ٹیم کے کپتان نے عزم کا اظہار کرتے ہوئے کہا کہ پہلے میچ میں شکست کے باوجود ٹیم ایونٹ میں دوبارہ واپسی کرے گی، ہمیں پہلے میچ پر سوچنے کی ضرورت نہیں، ہمارے پاس ایسے کھلاڑی موجود ہیں جو میچز جیتنے کی صلاحیت رکھتے ہیں۔

انگلینڈ کی ٹیم کے بارے میں بات کرتے ہوئے سرفراز احمد نے کہا کہ میزبان ٹیم ایک باصلاحیت ٹیم ہے، ہم نے ان کے خلاف سیریز کھیلی ہے تاہم ان کے خلاف بہترین کھیل پیش کرنے کی کوشش کریں گے۔

سرفراز احمد نے قومی کو یقین دلایا کہ آپ اگلے میچ میں آپ ہماری جانب سے بہتر کھیل دیکھیں گے۔

خیال رہے کہ ورلڈکپ کے پہلے میچ میں پاکستان کو ویسٹ انڈیز کے خلاف عبرتناک شکست کا سامنا کرنا پڑا تھا۔

Check Also

آج ویسٹ انڈیز اور بھارت کی ٹیمیں آمنے سامنے ہوں گی

مانچسٹر: آئی سی سی ورلڈ کپ 2019 کا 34واں میچ آج ویسٹ انڈیز اور بھارت …

Leave a Reply

Your email address will not be published. Required fields are marked *